ලොව ප්‍රථම සුපිරි විලෝපිකයා (First apex predator of the world)

පරිණාමික දිනපොත සමඟ දිගටම රැඳී සිටියානම් පෘථෘවි ජීවී ඉතිහාසය තුල විවිධ කාල රාමු තුල අණසක පැතිරවු නොයෙකුත් විලෝපිකයන් ගැන අදහසක් ඔබට මේ වන විට ඇති. එන්ටීලඩොන්ට්, කෘපාන දන්තී ව්යාඝ්රයන් , ප්රාග්ඓතිහාසික කිඹුලන් විශේෂ, විලෝපික තල්මසුන්, විවිධ රැප්ටර් විශේෂ පිලිබඳව ලිපි මේ වෙද්දි මෙහි ඉදිරිපත් කර තිබෙන්නෙ. ඩයිනෝසරයන් මිහිමත පහල වීමට වසර මිලියන ගනනාවකට එපිටින් කේම්බ්රියානු සාගරයේ ආහාර දාම තුල සුපිරි විලෝපික තත්වයට පරිණාමය වු සත්ව කාණ්ඩයක් පිලිබඳව තමයි මේ ලිපිය.

වසර බිලියන බාගයක්, එනම් වසර මිලියන 500 කට පමණ ඉහතින් කේම්බ්රියානු අවධිය තුල ජීවත් වූ මේ සත්වයන්ව විද්‍යාඥයන් හඳුන්වන්නේ ලොව ප්රථම සුපිරි විලෝපිකයා ලෙස. කේම්බ්රියානු අවධිය සමයෙදි ගොඩබිම් ජීවය ඇරඹී නැහැ. එය ආරම්භ වන්නෙ තවත් වසර මිලියන දෙසිය ගනනකින් පසු ඇරඹෙන ඩෙවෝනියන් අවධියේදි. කේම්බ්රියානු අවධිය තුල පැවතියේ සාගර ජීවය පමණයි. මේ අවධිය තුල සිටි ජීවීන් එතරම් විශාලව නොවැඩෙන කුඩා ජීවී විශේෂ. උදාහරණයක් ලෙස එකල පැතිරී සිටි ට්රයිලෝබයිටාවන් සැලකුවොත් සාමාන්ය ප්රමාණය 15 cm සහ උපරිමය 30 cm දක්වා වැඩෙන ජීවීන්. නමුත් ඇනෝමලෝකැරිස් (Anomalocaris) නමින් හඳුන්වන මේ සත්ව ගනය මීටරයක් පමණ විශාලව වැඩුනු ජීවීන් කොටසක්.

ඇනෝමලෝකැරිස් ප්‍රමාණාත්මක සංසන්දනය 

ඇනෝමලෝකැරිස් සත්වයන් සංයුක්ත ඇස් හිමි වු සත්ව කාණ්ඩයක්. පරිණාමිකව ආත්රෝපෝඩාවන්ට (කෘමීන්, ඉස්සන්, මකුළුවන්, කකුළුවන් අයත් කාණ්ඩය) ලඟ ඤාතීත්වයක් දක්වන ඇනෝමලෝකැරිස් සත්වයන්ගෙ ෆොසිල මුල් කාලවලදි කුමන සත්වයෙකුට අයත්දැයි හඳුනා ගැනීමට නොහැකි තත්වයක පැවතුනේ. පසුකාලීනව ෆොසිල විද්යාවේ දියුණුවත් සමඟ මේ සත්ව කාණ්ඩය නිවැරදිව හඳුනා ගැනීමට හැකියාව ලැබුනා.

ඇනෝමලෝකැරිස් ප්‍රතිනිර්මාණයක්

ශරීරයේ ඛණ්ඩක චලනය කරමින් මේ සත්වයන් පිහිනීම සිදුකර තිබෙන්නේ. රවුම් හැඩැති මුඛය කටු ආකාර උපාංග පිහිටිමෙන් දැඩි තෙරපුමක් ලබාදිමේ හැකියාව මේ සත්වයන්ට තිබෙනවා. මුඛය දෙපසින් විශාලව වැඩෙන අත් ද්විත්වයක් පැවතීමෙන් ගොදුරු දැඩිව ග්රහණය කර මුඛය තුලට රුවා ගැනීමට හැකියාව තිබි ඇත.

මුඛය දෙපසින් විශාලව වැඩෙන අත් ද්විත්වය

ෆොසිලගත මලද්රව්ය සමඟ ලැබෙන ට්රයිලොබයිටා කොටස් සහ ඇතැම් ට්රයිලෝබයිටා ෆොසිල වල ඇති කැපුම් කැලැල් ඇනෝමලෝකැරිස් සත්වයන්ගෙ උපාංග මඟින් සිදු කර ඇති බව තහවුරු වෙනවා. කේම්බ්රියානු යුගය තුල තිබුනු දියුණුම අක්ශි සහිත සත්වයන් ඇනෝමලෝකැරිස් සත්වයන් බවයි සැලකෙන්නේ. කාච 16000 කින් පමණ සමන්විත මේ සංයුක්ත ඇස් ගොදුරු දෘශ්ඨියට නිවැරදිව හසුකර දීමට සමත්ව තිබෙනවා.

කේම්බ්රියානු අවධියෙන් පසුව මේ සත්වයන් වාර්තා වෙන්නෙ නෑ. ලොව ප්රථම සුපිරි විලෝපිකයා ලෙස විරුදාවලිය ලත් මේ සත්වාගෙ නමින් ඇස්ටරොයිඩයක් නම් කර තිබෙනවා "8564 ඇනෝමලෝකැරිස්" ලෙස.

(ඡායාරූපය සහ ප්‍රතිනිර්මාණයන් අන්තර්ජාලයෙන් උපුටා ගන්නා ලදී)

#DOE

Link to Facebook post --->