ජෛව ලෝකය තුල ශක්තිවන්තයන් තේරීමේ යාන්ත්‍රණය අනුකම්පා විරහිත ලෙස ක්‍රියාත්මක වන විට සහකම්පන හැකියාවෙන් යුත් හෝමෝ සේපියානුවන්ට එදෙස බලා සිටීමට සිදුවන්නෙ තැතිගැන්මෙන්. පරිණාමික ක්‍රියාවලිය තුල නිරන්තර අරගල මගින් ජයග්‍රහකයා ලෙස ඉස්මතු වන්නන් සිය ජාන කිටුව ඉදිරි වර්ගයාට දායාද කරන විට පරාජිතයන් සංදර්භය තුලින් නශ්ඨව යෑම හෝ ඉන් පසු බැසීම ස්වභාවධර්මය තුල පිලිගත් නියාම ධර්මයයි.
මකූළුගෙ නායකත්වයෙන් යුත් සිංහ හවුල සිය වර්ගයාගෙ පොදු හැසිරීම් අභිබවා යමින් අසමසම රාජධානියක් නිර්මාණය කිරීමට සමත්වනවා. කෝලිශනය තුල එකිනෙකට නොදෙවෙනි ලෙස ක්‍රියාත්මක වූ සහෝදරයන් සය දෙනා සිංහ සමාජ ක්‍රමය තුල තමන්ට හිමි ස්ථානය අවබෝධ කරගත යුතුයි. එසේත් නැතිනම් තමන්ට අවශ්‍ය යැයි හැඟෙන ස්ථානය ලබා ගැනීමට සටන් වැදිය යුතුයි. මේ මහේශාක්‍ය මෘගයන්ගෙ සිතීම සහ පැවැත්ම සැකසී තිබෙන්නේ ඒ අනුව ක්‍රියා කිරීමටයි.
ටී යනු කෝලිශනය තුල අතිශයින්ම රෞද්‍ර ගති පැවතුම් ප්‍රචලිත කල දඩබ්බර සාමාජිකයා. හෝර්මෝන ක්‍රියාකාරීත්වයත් අසාමාන්‍ය නිර්භීත බවකිනුත් හෙබි ටී එළඹෙන මීලඟ තාර්කික පියවර වන්නෙ මකූළුට අභියෝග කිරීම. ටීගෙ සෙවනැල්ල බඳු නිවුන් සොහොයුරු කින්කි මේ බල අරගලයෙදි මකූළුගෙ ඇල්ෆා තත්වය නොසලකා තමන් සමඟ වසර ගනනක් එකට යුධ වැදුන ටී ගේ උපකාරයට පැමිණෙනවා. කෝලිශනය තුල වයසින් ලාබාලම ටී සහ කින්කි දැවැන්ත මකූළු සමඟ සටනට එළඹෙන අතර ඉතිරි මපෝගෝස්වරු මකූළුගෙ නායකත්වය පිලිගනිමින් මකූළුගෙ පාර්ශවයට එක් වෙනවා.
 |
| මිස්ටර් ටී |
හතරට දෙක අනුපාතයට කෝලිශනය දෙදරා යන අතර නිර්භීත ටී සහ කින්කි තමන්ගෙ වැඩිමහල් සොහොයුරන් සමඟ යුධ වැදීමට ගනු ලබන තීරණය ඔවුන් කුඩා කල දැක්වු නිර්භීතකම නැවත තහවුරු කරන්නක්.
ස්පාර්ටා ප්‍රයිඩය තුල දෙමසක් පමණ වයසින් වූ ටී සහ කින්කි වැඩුනු වෙස්ට් ස්ට්‍රීට් පිරිමි සතුන්ගේ ආහාරය මැදට පැන ඒවා උදුරාගත් සැටි නිරීක්ෂකයන් සටහන් කරනවා. වැඩුනු පිරිමි සිංහයෙකුගෙ ගොදුර වෙත ලඟාවීම දෙමසක් වයස පැටවුන් කිසිසේත් සිදු නොකරන ක්‍රියාවක්. ඒ ඔවුන්ගෙ ජීවිතය අනතුරේ හෙලන්නක්. ටී සහ කින්කි එකල මේ සිදුකල ක්‍රියාවන්ම ඔවුන්ගෙ වර්ධනයට අනුලෝමව පෞරුෂය තුලින් ප්‍රසාරණය වී ඇති අයුරු ගෙනහැර පාන්නෙ විශාල මකූළු සහ අනෙක් සොහොයුරන් තිදෙනාට එරෙහිව ඔවුන් දෙපල සංධානගත වී ඇති අයුරින්.
එකිනෙකාට නොදෙවෙනි කාය ශක්තියකින් යුත් මකූළු කෝලිශනය හා සටනින් ටී සහ කින්කි පරාජයට පත්වනවා. එතැන් පටන් මපෝගෝස් කෝලිශනය දෙකඩ වී නැගෙනහිරට පසුබසින ටී සහ කින්කි මපෝගෝස් නැගෙනහිර කෝලිශනය පිහිටුවා ගන්නා අතර බටහිර තමන් උපන් බිම් සහ අවට කලාපයන් තුල අණසක පතුරවමින් මපෝගෝස් බටහිර කෝලිශනය මකූළු සමඟින් අනෙක් සොහොයුරන් පාලනය කරනු ලබනවා.
මේ දේශපාලනික සිතියම ඉතාමත් වැදගත් කඩයිමක්. මන්යෙලාටි නදියෙන් බටහිර කලාපය මපෝගෝස් බටහිර කෝලිශනය පාලනය කල විට මන්යෙලාටි අතු ශාඛාවෙන් නැගෙනහිර පාලනය කරන්නෙ ටී සහ කින්කිගෙන් යුත් මපෝගෝස් නැගෙනහිර කෝලිශනය. නැගෙනහිර කෝලිශනයේ නැගෙනහිර සීමාව නිමවන්නෙ සාබී සෑන්ඩ් රක්ශිතයේ නැගෙනහිර මායිමෙන්. මේ නැගෙනහිර මායිමෙන් එපිටට පිහිටන්නේ මහා කෘගර් රක්ශිතයයි. මහා කෘගර් රක්ශිතයේ සිට තමයි මපෝගෝස් කෝලිශනය සමාජිකයන් හයකින් යුක්ත වූ සමය තුල පැමිණෙන සතුරු උවදුරු වලට මූලය. කෘගර් සිට සංක්‍රමණය වන සිංහ කෝලිශනයන් මැඩපැවැත්වීමට මුල් මපෝගෝස් සන්ධානයට හැකියාව ලැබුනත් බෙදී වෙන්වී ඇති මපෝගෝස් සන්ධානයේ ටී සහ කින්කි දෙසොහොයුරන් මේ අවදානමට දැන් සෘජුව සහ තනිව මුහුණ දීමට සිදුවනවා.
 |
| සාබී සිතියම |
අනෙක් පසින් මකූළුගෙ සන්ධානය ඊට වඩා සාපේක්ෂව ආරක්ෂාකාරී තත්වයක් උසුලනවා. ප්‍රථමයෙන්ම ඔවුන් තවමත් සිංහයන් හතරකගෙන් සමන්විත කෝලිශනයක්. දෙවනුව බටහිරට වන්නට පිහිටි කෘගර් දෙසින් පැමිණෙන සතුරන් නැගෙනහිරට ලඟාවීමට මත්තෙන් ටී සහ කින්කි පරාජය කර පැමිණය යුතුයි. එබැවින් මපෝගෝස් බටහිර සන්ධානය නැගෙනහිර සන්ධානයට ආරක්ෂාව සපයන ප්‍රේරණ කලාපයක් බවට පත්ව තිබෙනවා.
මන්යෙලාටි නදිය වසර දහස් ගනනක් පුරාවට සාබී වනපෙත තුලින් ගලා යමින් විවිධ ගැටුම් නරඹා ඇතිබවට සැකයක් නෑ.. නමුත් මපෝගෝස්වරුන් සම්ප්‍රාප්තියත් සමඟ වෙනදා නොදුටු බිහිසුණු සටන් සාබි වනපෙත තුලින් පැන නැගුනු සැටි ඈ දුටු බවනම් ප්‍රත්‍යක්ෂයි.
මපෝගෝස්වරු සිය අණසක පැතිරීම ඇරඹි සමයේ සිට මේ දක්වා ගතකල බිහිසුණු සමය මඳකට නවතාලමින් එළඹෙන වසර සාබි වන පෙත වසර කිහිපයකින් දුටු සාමකාමීම වසර බවට පත්වනවා. නමුත් මේ නිහඬබව පවතින අතරතුර මපෝගෝස්වරුන් නොදැන උතුරින් සහ නැගෙනහිර කෘගර් දෙසින් භයානක සතුරන් සංධානගත වීම ඇරඹෙනවා.
(ඡායාරූප අන්තර්ජාලයෙන් උපුටා ගන්නා ලදී)
To be continued...
#DOE
#Don
No comments:
Post a Comment