සාබී රක්ශිතය තුල මපෝගෝස් සහෝදරයන් ස්පාර්ටා සහ වෙස්ට් ස්ට්‍රීට් මේල්ස් සිංහයන්ගෙ ආරක්ෂාව යටතේ ඉතාමත් නීරෝගිව වැඩෙනවා. බරැති දඩයම් තම කණ්ඩායමේ සාමාජිකයන් දඩයම් කරන ආකාරය ඔවුන් උද්යෝගයෙන් නරඹනවා. වෙස්ට් ස්ට්‍රීට් කෝලිශන් එකේ ඇල්ෆා එහෙම නැත්තන් නායකයා වෙන්නෙ 'බ්ලොන්ඩී' නැමැති සිංහයා. ඒ කියන්නෙ මපෝගෝස් සහෝදරයන් පස් දෙනාගෙ පියා වෙන්නෙ බ්ලොන්ඩි.
 |
| බ්ලොන්ඩි |
මේ අතර මිස්ට ටී සහ කින්කි අතර සහෝදර බැඳීම තවත් පුළුල් වෙනවා. ටී ගෙ සෙවනැල්ල මෙන් නිතරම පසුපසින් සිටින කින්කි , ටීගෙ ක්‍රියාකාරකම් වලදි ඔහුගෙ දකුණත බවට පත්වෙනවා. (මේ හැසිරීම පසුකාලීන ක්‍රියාකාරකම් වලදි ප්‍රකට වෙන කාරණයක්) සරලවම කින්කි නොමැතිව ටී දකින්න ලැබෙන්නේ නෑ.
ස්පාර්ටා, වෙස්ට් ස්ට්‍රීට් කෝලිශන් එකේ දඩයම් ඉතාමත් බිහිසුණු තත්වයන්ට මඟ පාදනවා. පලවෙනි කොටසේ සඳහන් කරා මපෝගෝස් සහෝදරවරු පහ ඇතුලු තවත් පැටවුන් පස් දෙනෙක් මේ කණ්ඩායමේ සිටි බව. කුළු මීමන් දඩයම වැනි බිහිසුණු අවස්ථාවන් කිහිපයකදි මේ පැටවුන් සියළුම දෙනා වාර කිහිපයක් අනතුරලට ලක් වෙනවා. වරක් පැටවුන් දෙදෙනෙක් කුළුමීමන් රංචුවක් විසින් ඝාතනය කරනු ලබනවා. නමුත් වාසනාවකට මපෝගෝස් සහෝදරයන් දිවි රැකගන්නවා. වෙස්ට් ස්ට්‍රීට් කෝලිශන් එකෙ පිරිමි සතුන් පහකින් යුත් කෝලිශන් එකක්. බ්ලොන්ඩිගෙ නායකත්වය යටතෙ ක්‍රියාත්මක වන මේ කෝලිශන් එක වෙනත් සතුරු සිංහයන්ට ස්පාර්ටා ප්‍රයිඩ් එකට ලංවෙන්න ඉඩ තියන්නෙ නෑ. යම්හෙයකින් වෙස්ට් ස්ට්‍රීට් සිංහයන් පරදවා වෙනත් කෝලීශන් එකක් ස්පාර්ටාවන්ට ලංවුවොත් සිදුවෙන පලමු කාර්ය සියළු පැටවුන් ඝාතනයට ලක්වීම. ඒ තමයි ස්වාභාවධර්මයේ නීතිය. පරාජිතයන්ගෙ ජාන ඉදිරියට ගමන් කිරීම වලක්වන ක්‍රමය. මේකට කියනවා Infanticide කියලා. ජයග්‍රාහී සිංහයන් විසින් පැටවුන් ඝාතනය කල සැනින් සිංහ ධේනුවන් නැවත අභිජනනය සඳහා ශාරීරිකව ප්‍රතිසංවිධානය වෙනවා. හෝර්මෝන මඟින් සිදුකරන මේ කාර්ය නිසා ජයග්‍රහයකයන්ට නැවත අභිජනනය සිදුකර තමන්ගෙ ජාන ඉදිරියට දායාද කිරීමට තමයි මේ යාන්ත්‍රණය සැකසී තිබෙන්නේ. වාසනාවකට බ්ලොන්ඩිගෙ නායකත්වයෙන් යුත් වෙස්ට් ස්ට්‍රීට් කෝලිශන් එක අතිශයින්ම ශක්තිමත් කණ්ඩායමක්. සතුරු උවදුරු වලින් මපෝගෝස් සහෝදරයන් ආරක්ෂා වෙන්නෙ ඒ නිසා.
මේ අතරේ මපෝගෝස් සහෝදරයන් නැවත අන්තරායකට ලක්වෙනවා. කණ්ඩායමට අයත් නැති පිටස්තර තරුණ සිංහයෙක් වෙස්ට් ස්ට්‍රීට් ආධිපත්‍ය දැරූ සාබි වන පියසට පැමිණෙනවා. මේ සිංහයා යාන්තන් තරුණ වයස අබියස සිටින සිංහයෙක්. පෙර සඳහන් කල පරිදි මේ පිටස්තරයා මපෝගෝස් සහෝදරයන්ගෙ පැවැත්මට තර්ජනයක්. ස්වාභාවධර්මය ක්‍රියාත්මක විය යුතුයි. සිදුවිය හැකි, සිදුවිය යුතු අවස්ථා දෙකක් පවතිනවා. පිටස්තරයා වෙස්ට් ස්ට්‍රීට් කෝලිශන් එකෙන් ඝාතනය වියු යුතුයි. නැතිනම් පිටස්තරයා විසින් සිංහයන් පහකින් සමන්විත වෙස්ට් ස්ට්‍රීට් කෝලිශන් එක පරාජය කල යුතුයි. නමුත් ස්වාභාවික නීතිය අභිබවා ධෛවය ක්‍රියාත්මක වෙන්නෙ මේ අවස්ථාවෙදි. පිටස්තරයාව වෙස්ට් ස්ට්‍රීට් කෝලිශන් එක මඟින් පිලිගන්නවා, පිටස්තරයාත් කිසිඳු ආවේගයකින් තොරව ස්පාර්ටා ප්‍රයිඩ් එකේ සාමාජිකත්වය පිලිගන්නවා. මහලු වයසේ පසුවන වෙස්ට් ස්ට්‍රීට් කෝලිශන් එකට තවත් දඩයම් සහයකයෙකු ලැබෙනවා. මපෝගෝස් සහෝදරයන්ට වැඩිමහල් සහෝදරයෙක් විදිහට ක්‍රියාකරන්න මේ අලුත් සිංහයා පටන් ගන්නවා. මේ පිටස්තරයාට ලැබෙන නම 'මකූළු'
මකූළු අනෙක් පැටවුන් පස් දෙනාට වඩා වසර දෙකක් වැඩිමහල්. මකූළු ගැන සත්වවේදින් පවසන්නේ වෙස්ට් ස්ට්‍රීට් කෝලිශන් එක යටතේ පැවති වෙනත් ප්‍රයිඩ් එහෙක වසර කිහිපයකට කලින් නැතිවුන පැටවෙකු ලෙසයි (කෝලිශන් එකක් යටතෙ තිබෙන්නෙ එක් ප්‍රයිඩ් එකක් පමණක් නෙවෙයි). මකූළුගෙ ඉතිහාසය එතරම් පැහැදිලි නැති වුනත් වෙස්ට් ස්ට්‍රීට් ජාන ඔහුට තිබු නිසා ඔහුව පිලිගත්තාය යන්නටත් සඳහන් වෙනවා. කෙසේ නමුත් මකූළු යනු අද්වීතිය සිංහයෙක්. මපෝගෝස් සහෝදරත්වය සම්පූර්ණ වන්නෙ මකූළුගෙ සම්ප්‍රාප්තියත් සමඟ.
මපෝගෝස් සහෝදරයන් වයසින් වැඩෙත්ම අනෙක් සියළු සිංහ පැටවුන් අතවිඳින රැලෙන් පිටුවහල කිරීම ඔවුන්ටත් උරුම වෙනවා. කාලයත් සමඟ ශක්තිමත්ව වැඩෙන මපෝගෝස්වරු ස්පාර්ටාවන්ගෙන් සහ වෙස්ට් ස්ට්‍රීට් කෝලිශන් එකෙන් පිටුවහල් වෙන්නෙ එලෙස. දැන් ඔවුන් දඩබිම් රහිත තරුණයන්. ඉබාගාතේ සැරිසරමින් දඩයම් සොයාගැනීමටත් වැඩනු සිංහ ප්‍රාහාර වලින් ගැලවීමටත් ඔවුන්ට සිදුවෙනවා. මකූළු, මිස්ට ටී, ස්කාර්, ප්‍රිටි බෝයි, ඩ්‍රෙඩ්ලොක්ස්, කින්කි සාබි වනපෙත තුල තමන්ගෙ රාජධානියක් සොයා පිටවන්නෙ එලෙස. පිටුවහල් කරන පැටවුන්ට තර්ජන ඒමට, කුසගින්න, සතුරු උවදුරු මේ සියල්ල අතරින් ඔවුන්ගෙන් රැකෙන්නෙ සීමිත පිරිසක් පමණයි. නමුත් මපෝගෝස්වරු මේ අභියෝග ජයගැනීමට සමත්.
මපෝගෝස් කෝලිශන් එක සාමාජිකයන් හයකින් සමන්විත තරුණ සිංහයන්. ඔවුන් යන්ත්‍රයක් මෙන් ක්‍රියාශිලියි. ලිහිසි තෙල් යෙදුව යන්ත්‍රයක් මෙන් මපෝගෝස්වරු තමන්ගෙ කාර්යභාරයන් දැන සිටියා. මකූළු කණ්ඩායම මෙහෙය වන විට මිස්ට ටී ඔවුන්ගෙ ප්‍රහාරක හිස බවට පත්වෙනවා. ටීගේ දකුණත කින්කි. විශාල කුළුමීමකුගෙ හිසට ටී පහර දෙන විට කින්කි උගුරු දණ්ඩට පහර දෙනවා. බරැති මකුළු විසින් මීමාගෙ පිටකොන්ද විනාශ කරන විට ස්කාර්, ඩ්‍රේඩ්, ප්‍රිටි බෝයි පසුපස ගාත්‍රාවලට පහර දෙනවා. දඩයමට කිසිඳු ගැලවීමක් නෑ.... මපෝගෝස්වරු සාබී වනපෙත තුල විශාල දඩයම් අරඹන්නෙ එලෙස. සිංහයන් හයකින් යුත් තරුණ කෝලිශන් එකක් යනු ඉතාමත් දුර්ලභ සංසිද්ධියක්. ඊටත් නොදෙවෙනි ලෙස ඔවුන් සහෝදරයන්. තමන්ගෙ කාර්යභාරය හොඳින් දැනසිටි සහෝදරයන්.
 |
| ප්‍රසිද්ධ ඡායාරූපයක්... මකුළු හැර ඉතිරි මපෝගෝස්වරු වතුර බොන දර්ශනයක් |
(ඡායාරූප අන්තර්ජාලයෙන් උපුටා ගන්නා ලදී)
To be continued...
#DOE
#Don
No comments:
Post a Comment