හෙක්ටෙයාර 70000 ක පමණ තමන්ගෙ අණසකට යටත් කරගන්න හැකිවු මපෝගෝස් කෝලිශනය තමන්ගෙ මවු ප්‍රයිඩය වූ ස්පාර්ටා ප්‍රයිඩය නැවත ලබාගනිද්දි එහි දේශපාලනය වෙනස්ව පවතින්නේ. වෙස්ට් ස්ට්‍රීට් කෝලිශනයේ ග්‍රහනයෙන් වෙනත් සිංහයන්ගෙ අණසකට යටත්ව තිබු ස්පාර්ටා ප්‍රයිඩයට අත්වන්නෙත් එතෙක් අනෙකුත් ප්‍රයිඩයන්ට මපෝගෝස් කෝලිශනය තුලින් අත්වු ඉරණමයි.
මපෝගෝස් කෝලිශනය තමන් පිටුවහල් කල දින පටන් ක්‍රියාත්මක වන්නෙ වැඩිමහල් සහෝදරයා, එසේත් නැතිනම් අර්ධ සහෝදරයා වන මකූළුගෙ නායකත්වය යටතේ. මකූළුගෙ ප්‍රතාපවත් බව මපෝගෝස් කෝලිශනය තුල නායකත්ව සාධකය මෙහෙය වීමට ප්‍රමාණවත් වූවත් සිංහ දේශපාලනය තුල එය වැඩිකල් රඳා පවතින්නෙ නෑ. ඇල්ෆා තත්වය තහවුරු කරගැනීම යම් අවස්ථාවකදි අත්‍යවශ්‍යය සාධකයක්. කෝලිශනය උපරිම බලයට පැමිණෙන විට මකූළු ඇල්ෆා තත්වය සාධනය කරගන්නවා. මකූළුගෙ බලයට යම් අභියෝගයක් කුඩා දෙසොහොයුරන් වන් ටී සහ කින්කි තුලින් පැන නැගුනත් එය නිශේධනය කිරීමට මකූළු ඒ ඒ අවස්ථාවල සමත් වෙනවා.
මේ වෙද්දි තම අණසකට නතුවු ප්‍රයිඩයන් තුල ගැහැණු සත්වයන් මකූළුට දාව පැටවුන් බිහිකිරීම සිදුවෙනවා. කෝලිශනයේ ඇල්ෆා තමයි සුදුසුකම් ලබන්නේ ඉදිරි පරම්පරාවන්ට තමන්ගෙ ජාන සංසරණය කිරීමට. මකූළු අද්විතීය සිංහයෙකු බවට පත්වන්නේ කෝලිශනය තුල දැක්වු බල අරගල සහා ආක්‍රමණයන් තුල අතිශයින් රෞද්‍ර සහ අනුකම්පා විරහිත ලෙස හැසිරුනත් තමන්ගෙ ප්‍රයිඩවල පැටවුන්ට ඉතාමත් කාරුණික පියකු බවට පත්වීම. මකූළුගෙ ඉතිහාසය සලකා බැලුවම ස්පාර්ටා ප්‍රයිඩය තුලට ඔහු පිටස්තරයෙකු ලෙස පැමිණෙන විට ඔහුව ප්‍රයිඩය තුලට පිලිගත්තත් ඔහුට ප්‍රයිඩය තුල ලැබුනෙ දෙවනි පුරවැසියෙකුගෙ සැලකිලි. සිංහ කණ්ඩායමක පවතින සමාජ ක්‍රමය අනුව මකූළුට ස්පාර්ටා වෙස්ට් ස්ට්‍රීට් හවුල තුලදි කුඩාම පැටියෙකුට ලැබෙන සැලකිල්ලටත් වඩා අඩු තත්වයක් ලැබුනෙ. ආහාර ගැනීමේදි දඩයමේ අවසන් ඵල තමයි මකුළුගෙ කොටස. එමෙන්ම අනෙකුත් පිරිමි සිංහයන්ගෙ පහරදීම් වලින් අඩුවක් තිබුනෙත් නෑ. කුඩා පැටවුන් වැඩුනු පිරිමි සිංහයෙකුට ගරු සරුව සිටීමට සාමාන්‍යයෙන් වගබලාගත්තත් මකූළුගෙ පිට උඩ නැගීමටත් , සෙල්ලම් කිරීමටත් ස්පාර්ටා පැටවුන් ක්‍රියාකල විට මකුළු තමන්ගෙ තත්වය දත් නිසාදෝ ඒ සියල්ල ඉවසා සිටි සිංහයෙක්. ඒ කෙසේ වෙතත් කුඩා මපෝගෝ සහෝදරයන් පස් දෙනා මකුළුගෙ ප්‍රියතමයන්. පිටුවහල් කිරීමේදි සංධානගත වීමට මකුළු සහ සහෝදරයන් පස් දෙනාට හැකිවන්නේ ඒ නිසයි. මකූළු තමන් අයිති කණ්ඩායමෙන් කුඩා කලදිම පිටමං වන්නට ඇත්තේත් මවු ප්‍රයිඩයට බාහිරින් ආ ප්‍රහාරයක් විය හැකි බව උපකල්පන පවතිනවා. ඒ අනුව සලකා බැලු විට මකූළු යනු සිංහ සමාජය තුල පහතම රෑන්ක් එකේ සිට එතෙක් මෙතෙක් බිහිවු බලවත්ම කෝලිශනයේ ඉහලට පැමිණි සිංහයෙක්. මේ අත්දැකීම් සියල්ලගේම එකතුවක් ලෙස මකූළු ඇල්ෆා බවටත්, ඉන්පසු පිය පදවියේ කාර්යභාරයන් මනාව වටහා ගැනීමත් සිදුකල බව නිරීක්ෂකයන් පවසනවා.
මේ සිදුවීම් මෙසේ වනවිට කෝලිශනයේ දඩබ්බරයන් දෙදෙනා වන ටී සහ කිංකි දිගින් දිගටම ඇල්ෆාට තර්ජනයක් බවට පත්වනවා. විටින් විට ඉහල යන ටෙස්ටොස්ටෙරෝන් ප්‍රතිශතයත්, නෛසර්ගික ප්‍රචණ්ඩත්වයත්, අසාමාන්‍ය රෞද්‍ර බවත්, ඊටත් අසාමාන්‍ය නිර්භීත බවකිනුත් හෙබි ටී සහ කින්කි මේ අභියෝගය එල්ල කරන්නෙ මකුළු වෙත. ටී ගේ සෙවනැල්ල මෙන් වූ නිවුන් සොහොයුරු කිංකි කිසිදිනක ටී මඟහැර නොයන නිසා මේ දෙසොහොයුරන් ක්‍රියාත්මක වන්නෙ එක් යන්ත්‍රයක් ලෙස. සිංහ දේශපාලනය තුල බල අරගල අඛණ්ඩව පවතිනවා. හෙක්ටයාර 70000 ක භූමි උරුමය සඳහා මපෝගෝස් කෝලිශනය තුල බල අරගල ආරම්භ වන්නෙ එලෙසින්.
(ඡායාරූපය අන්තර්ජාලයෙන් උපුටා ගන්නා ලදී)
 |
| ටී සහ කින්කි |
(ඡායාරූපය අන්තර්ජාලයෙන් උපුටා ගන්නා ලදී)
To be continued...
#DOE
#Don
No comments:
Post a Comment