"අඳුරු මහද්වීපයේ දකුණට වන්නට පිහිටි ඝන වනාන්තරක් තුල සැරිසරන ආදී හොමිනිඩ් වානරයෙක්. උල් දත් සහ නිය සහිත අනෙකුත් වනාන්තර වාසීන් මෙන් නොව මේ හොමිනිඩ් වානරයාට අනතුරකින්, විලෝපිකයෙකුගෙන් දිවි රැක ගැනීමට කිසිඳු ස්වාභාවික අවියක් පිහිටා නැහැ. වනාන්තර තුල ගමන් කිරීමම මරණයට අතවැනීමක් වුනත් බිය මැඬගෙන මතුවන්නෙ කුසගින්න.
ඇට බිඳෙන හඬක් සමඟ හොමිනිඩ් වානරයාට දකින්න ලැබෙන්නෙ කාළ වර්ණ ඩයිනොෆෙලිස් බිළාලයෙකු කූඩූ මුවෙක් අනුභව කරන දර්ශනයක්. ඩයිනොෆෙලිස් බිළාලයා ගොදුර හැර ගිය පසු කෑමට යමක් ඉතිරි වෙයිද ? උඩු සුළං සමඟ හොමිනිඩ් වානරයාගෙ ඉව ඩයිනොෆෙලිස්ගෙ නාස් කුහර තුලට දැනටමත් ලඟා වී ඇත්ද ? "
මොරීසියො ඇන්ටන් නැමැති ප්‍රාග්ඓතිහාසික දර්ශන ප්‍රතිනිර්මාණය කරන චිත්‍ර ශිල්පියාගෙ චිත්‍රයකට තමයි මම ඉහත කෙටි කථාව ලිව්වෙ. කාරණා කිහිපයක් ගැනම මේ චිත්‍රය අලලා කථා කරන්න පුළුවන් නිසාම මේක තෝරා ගත්තා. ප්‍රාග්ඓතිහාසික ප්‍රතිනිර්මාණ සිදු කිරීමේදි බොහෝ අයට තිබෙන ගැටලු තමයි මේවා මෙහෙම වුනාය කියන්නෙ කොහොමද ? කුමන කාරණා මත පදනම් වෙලාද මේ චිත්‍ර අඳින්නෙ ? වසර මිලියන ගනනකට පෙර සිදු වු ඇසින් දකින්නට නොහැකි දේවල් ගැන මෙහෙම කොහොමද අඳින්නෙ ? මේවා හුදෙක් කතා පමණයි... ආදී ගැටලු රැසක්.
හුදෙක් චිත්‍ර ශිල්පියෙක් වූ පමණින් මේ ප්‍රතිනිර්මාණ සිදු කරන්න බැහැ. (ඕනම කෙනෙක්ට අඳින්න පුළුවන් නමුත් විද්‍යාත්මක නිරවද්‍යතාව ගැන මේ කියන්නෙ). මේ සඳහා පුරාණ පරිසර පද්ධති, ජෛව විද්‍යාත්මක තොරතුරු සහ වර්තමානයේදි තිබෙන පරිසර පද්ධති, ජීවී විශේෂ ගැන පෘථුල දැනුමක් තිබිය යුතුයි. මේ කාරණා වලට අමතරව ව්‍යුහ විද්‍යාව සම්බන්දයෙන් ගැඹුරු දැනුමක් තිබිය යුතුයි. ඒ ඒ කාරණා සංතෘප්ත වෙනවානම් තමයි යම්කිසි විද්‍යාත්මක සොයා ගැනීමක් ප්‍රතිනිර්මාණය සඳහා 'පත් කරන ලද' (commissioned paleoartist) බවට පත් වෙන්නෙ. ඒ අනුව තමයි එකී නිර්මාණය, අදාල සොයාගැනීම සම්බන්දව පලවෙන පිලිගත් ප්‍රකාශන වලටත් ගනු ලබන්නෙ.
අපි උදාහරණයකට ගමු මේ පෝස්ට් එකේ තිබෙන චිත්‍රය. මේ ප්‍රතිනිර්මාණයේ ඉන්න හොමිනිඩ් තමයි 'ඔස්ට්‍රලෝපිතෙකස් ඇෆ්රිකානස්' විශේෂය. මීට වසර මිලියන 3.3 - 2.1 ත් අතර කාලයේදි තමයි ඇෆ්රිකානස් අප්‍රිකානු මහද්වීපය තුල පැතිරෙන්නෙ. මේ පෝස්ට් එකේ ඉන්න බිළාලයා තමයි 'ඩයිනොෆෙලිස් බාර්ලෝවි' නැමැති ඩයිනෝෆෙලිස් විශේෂය. මේ ඩයිනෝෆෙලිස් විශේෂය ජීවත් වෙන්නෙත් ඇෆ්රිකානස් ජීවත් වු සමයේම, ඇෆ්රිකානස් ජීවත් වූ වටපිටාවෙම තමයි.
ඩයිනොෆෙලිස් බිළාල කුලයේ වුනාට සිංහයන්, කොටින් ආදියට වඩා ඉතාමත් ආදිකල්පික සත්වයෙක්. මේ ඡායාරූපයේ නොපෙනුනාට මොවුන්ට ඉතාමත් දිගු රදනක දත් පිහිටනවා ස්මයිලඩොන්/සේබර්ටුත් කැට් (කෘපාන දන්තී ව්‍යාඝ්‍රයන්) මෙන්. හැබැයි ස්මයිලඩොන්ලාගෙ තරම් දීර්ඝව මේවා වැඩෙන්නෙ නැහැ. ඒ නිසා තමයි ඩයිනොෆෙලිස් කියන නම ලැබෙන්නෙ, එහි අර්ථය ව්‍යාජ කෘපාන දන්තී ව්‍යාඝ්‍රයා (false saber tooth). ඩයිනොෆෙලිස් ඉතාමත් ශක්තිමත් මාංශපේෂි සහිත බිළාලයෙකු ලෙස තමයි ෆොසිල සාධක මත තීරණය වෙන්නෙ. බරැති දේහයත්, දිවීමට වඩා පැනීමට සකස්වූ ව්‍යුහයත් නිසා තෘණබිම් වලට වඩා ඩයිනොෆෙලිස් ප්‍රිය කරන්නට ඇත්තෙ ඝන වනාන්තර. සැඟව සිට ගොදුරු බිම හෙලන (ambush predator) වර්ගයේ විලෝපිකයෙක්. ඒ නිසාම වර්ණ රටාව ගැන පවතින විද්‍යාත්මක කල්පිතය තමයි තිත් රටා හෝ රොසේට් රටා වලට වඩා ඉරි සහිත වර්ණ රටාවක් තිබෙන්නට ඇති බව.
ඇෆ්රිකානස් ගැන කතා කරද්දි ඇතැම් ඇෆ්රිකානස් සහ පැරන්ත්‍රෝපස් (සමකාලීන තවත් වානර රූපී මානවාකාරයක්) මානව ෆොසිල වල තිබෙනවා විලෝපික රදනක දත් පහරවල්. මේ රදනක දත් පහරවල් බොහෝ විට ගැලපෙන්නෙ ඩයිනොෆෙලිස් සහ මෙගන්ටෙරියොන් වැනි විශේෂවල දන්ත සැකැස්මට. ඒ නිසා ඇෆ්රිකානස් සහ ඩයිනොෆෙලිස් හමුවීම් මේ ආදිකල්පික යුගය තුල නිරන්තරයෙන්ම සිදුවන්නට ඇති බව විශ්වාස කරනවා.
නැවත ඡායාරූපයේ දැක්වෙන ප්‍රතිනිර්මාණයට ආවොත් ඇෆ්රිකානස් සහ ඩයිනොෆෙලිස් හමුවක් මොරීසියො සිතුවම් කර තිබෙනවා. විද්‍යාත්මක වාර්තා අනුව ගන වනාන්තරයන්, ඩයිනොෆෙලිස් ඉතාමත් ශක්තිමත් ලෙස නිරූපනය වෙනවා, කූඩු මුවන් කියන්නෙ ඩයිනොෆෙලිස්ගෙ ප්‍රියතම ආහාරයක්. මේ කාරණා ගොන්න අතරට මොරීසියො ඩීටේල් එකක් එකතු කරනවා ඩයිනොෆෙලිස්ව තනි කළු වර්ණයෙන් සටහන් කරලා. මෝරිසියො මෙහි අර්ථ දක්වන්න උත්සහ කරන්නෙ ඩයිනොෆෙලිස් මෙලනිස්ටික් නිදර්ශකයක්. මෙලනිස්ටික් නිදර්ශක ගැන මම මීට පෙර පරිණාමික දිනපොතේ විස්තර කරා.
මොරීසියො ලෝකය පුරාම ජීවත්වන බිළාලයන් නිරීක්ෂණය කරමින් ඔවුන්ගෙ ව්‍යුහ විද්‍යාව, බයොමෙකැනික්ස් විෂය පථය, චර්යා රටා නිරීක්ෂණය කරමින් ලෝකය පුරා ඇවිදින ගමන් තමයි මේ කමිශන්ඩ් ආර්ට්වර්ක්ස් සිදු කරන්නෙ. ඔහුගෙ ප්‍රතිනිර්මාණවල ජීව ගුණය සහ ඉහල තත්වයට හේතු වෙන්නෙ ඔහු සතු මේ නිරීක්ෂණ හැකියාව සහ දැඩි අධ්‍යනයයන්. ඒ අනුව ඔබට පේනවා ඇති මේ ප්‍රතිනිර්මාණ හුදෙක් චිත්‍ර නොව දැඩි වෙහෙසක්, අධ්‍යනයක් සහ ශාස්ත්‍රීය අවබෝධයක් සහිතව සිදු කෙරෙන ඒවා බව. මේ දක්වපු ප්‍රතිනිර්මාණය සිදුකිරීමට පමණක් විද්‍යාත්මක ප්‍රකාශන හා පත්‍රිකා සිය ගනනක තොරතුරු සිතුවම් ශිල්පියා විසින් අවබෝධ කරගත යුතුයි. Paleoart පුරාණ තත්ව සිතුවම්කරණය කියන්නෙ කලාවකටත් වඩා විද්‍යාවක්. දැන් ඔබ දැනගත්ත ඔස්ට්‍රලෝපිතෙකස් ඇෆ්රිකානස් සහ ඩයිනොෆෙලිස් බාර්ලෝවි වැනි විශේෂ පිළිබඳව යම්කිසි ජීව ගුණයක් සහිතව ගෙන හැර දැක්වීමට මේ ප්‍රතිනිර්මාණකරණය ඉතාමත් ඉවහල් වෙනවා. වඳව ගිය නව සත්ව විශේෂයක් ප්‍රකාශනයට පත්වු වහාම එහි පත් කරන ලද චිත්‍රශිල්පියාගෙ ප්‍රතිනිර්මාණය සමඟ තමයි මම පරිණාමික දිනපොත තුලින් ඔබට ඒ පිළිබඳව සටහන ගෙන එන්නෙ, ඒ එමඟින් ඔබට වඩාත් හොඳ අවබෝධයක් ලබා ගැනීම සඳහා.
(The image is a scientific reconstruction by Mauricio Anton Ortuzar - Paleoartist and Illustrator)
#DOE
No comments:
Post a Comment