යෝධ දැල්ලන් (Giant Squid)

සමුදුරු තරණයේදි නාවික යාත්‍රා විනාශ කරන යෝධ දැල්ලන් සහ බූවල්ලන් ගැන කතා නොඅඩුව අසන්නට ලැබෙනවා ලෝකයේ සෑම ප්‍රදේශයකින්ම. නාවිකයන්ගෙ කතාවල සත්‍යතාව කෙසේ වෙතත් වර්තමාන සාගර තුලත් මේ යෝධ දැල්ලන් විශේෂ ජීවත් වනවා. මේ පහත ඡායාරූපය තුල දැක්වෙන්නෙ එවන් යෝධ දැල්ලන් විශේෂයක ඡායාරූපයක්.

Architeuthis dux (Giant squid)

අපෘෂ්ඨවංශික සත්වයන් (කොඳු ඇට පෙලක් නොමැති සත්ව කාණ්ඩ) අතරින් ලොව ජීවත්වන විශාලතම සත්වයන් තමයි යෝධ දැල්ලන්. ඡායාරූපයේ දැක්වෙන විශේෂය තමයි Architeuthis dux (Giant squid) විශේෂය. නමුත් මේ විශේෂයටත් වඩා විශාලව වැඩෙන දැල්ලන් විශේෂයක් තමයි Mesonychoteuthis hamiltoni (Collosal squid). 

ප්‍රමාණයන්ගෙන් කිව්වොත් Giant squid අඩි 33 ක් පමණ දිගටත් බරින් 275 kg පමණත් විශාලව වැඩෙනවා. Collosal squid විශේෂය දිගින් අඩි 46 කුත් බරින් 750 kg පමණත් වැඩෙනවා. මේ විශේෂ ද්විත්වය ගැනම තවමත් අධ්‍යනය කර තිබෙන ප්‍රමාණය ඉතාමත් අල්පයි. ඉතාමත් ගැඹුරු සාගර තුල ජීවත්වන මේ විශේෂයේ මිය ගිය නිදර්ශක තුලින් තමයි අධ්‍යන කටයුතු සිදුවී තිබෙන්නෙ.

යෝධ දැල්ලන් කියන්නෙ තෙල්මන්ද තල්මසුන්ගෙ ආහාර ප්‍රමාණයෙන් 70% පමණ සපයන ගොදුරක්. ගැඹුරු සාගර තුල කිමිදෙන තෙල්මන්ද තල්මසුන් මේ යෝධ දැල්ලන්ව දඩයම් කරනවා. බොහෝ තෙල්මන්ද තල්මසුන්ගෙ ආහාර ජීර්ණ පද්ධතිය තුලින් යෝධ දැල්ලන්ට අයත් කොටස් දකින්න ලැබෙනවා. ඒ වගේම මේ දැල්ලන් තෙල්මන්ද තල්මසුන්ට පහරදීම හේතුවෙන් තෙල්මන්ද තල්මසුන්ගෙ මුඛය අවට සිරීම් ලකුණු දකින්න පුළුවන්. ගැඹුරු සාගර තුල දියත් වෙන මේ යෝධයින්ගෙ සටන් සෑම විටම තෙල්මන්ද තල්මසුන්ගෙ ජයග්‍රහණයකින් අහවර නොවන බවත් ඇතැම් වාර්තාවල සටහන් වෙනවා. නමුත් මේ ගොදුරු රටාව තවමත් මිනිස් ඇසකින් නිසි ආකාරයෙන් අධ්‍යනය වී නැහැ. ගැඹුරු මුහුදු තුලට යැවු නියමුවන් රහිත සබ්මැරීන තුලින් ඉතාමත් අපැහැදිලි ඡායාමාත්‍ර වීඩියො දර්ශන කිහිපයක් දකින්න පුළුවන් තෙල්මන්ද තල්මසුන්ගෙ දැල්ලන් දඩයම පටිගත වුන.

කෙසේ නමුත් මේ යෝධ දැල්ලන් ඉතාමත් අභිරහස් ජීවීන්. සාගර ගැඹුරු තුල ආගාධ අතර මොවුන්ගෙ විශාල ප්‍රමාණයේ නිදර්ශක ජීවත් වෙන බව විශ්වාස කරන්න පුළුවන්. Collosal squid විශේෂ පැතිරීම තියෙන්නෙ දකුණු අර්ධගෝලයේ ඇන්ටාක්ටික් කවය වටා. නවසීලන්තය, දකුණු ඇමරිකාව, දකුණු අප්‍රිකා ආදී මුහුදු සීමා තුලින් මේ සත්වයන්ගෙ නිදර්ශක සහ දර්ශනය වීම් වාර්තා වෙනවා. Giant Squid ලෝකයේ විවිධ ප්‍රදේශ තුලින් වාර්තා වෙනවා. 

මේ යෝධ දැල්ලන් ගැන කතා කරද්දි තවත් එක් සිත්ගන්නාසුළු කාරණයක් තමයි ඇතැම් වාර්තා තුල සඳහන් වෙන මොවුන්ගෙ දඩයම් උපක්‍රම. ජෛව සංද්වීප්තතාව (Bioluminescence) ආධාරයෙන් මොවුන් ගොදුරු ආකර්ශනය කරගන්නා බව සඳහන් වෙනවා. සරලව කිව්වොත් කණාමැදිරියන් වගේ ආලෝකය නිපදවීමේ හැකියාව.

මීලඟ අවස්ථාවේදි මාළු වෙළඳසැලකින් කුඩා දැල්ලන් මිලදී ගන්නා අවස්ථාවක මතක් වෙයි ඔවුන්ගෙ ඤාතීන් වන ගැඹුරු සාගරයේ වෙසෙන යෝධ දැල්ලන්ව. පරිණාමික ක්‍රියාවලිය ඉතාමත් අපූරු ක්‍රියාවලියක්. නොගැඹුරු මුහුදේ කුඩා විශේෂ ජීවත්වන විට ඔවුන්ගෙ ලඟම ඤාතීන් ගැඹුරු මුහුදට අනුවර්තනය වෙලා තිබෙනවා යෝධයන් ලෙස ජීවත් වීමට. ප්‍රමාණය කොතරම් විශාල වුනත් ඔවුන්වත් හඹා යන විලෝපික තෙල්මන්ද තල්මසුන් සිටින්නේ 'There's always a bigger fish' කියමන සනාථ කරමින්. වෙනසකට තිබෙන්නෙ මේ දඩයමේ සිටින තල්මසුන් මත්ස්‍යන් නෙමෙයි, ක්ශිරපායින්.


(ඡායාරූපය අන්තර්ජාලයෙන් උපුටා ගන්නා ලදී)

#DOE

Link to Facebook post --->