දැන් මේ ලියන දේ මේ පිටුවේ විෂය පථයට පරිභාහිර යමක්. නමුත් ලියා තැබිය යුතුයි කියලා සිතුන වේලාවෙ ඊට ඉඩහසර ලැබුන නිසා ලියලා ඉවර කරනවා යම් කෙනෙකුට ප්‍රයෝජනවත් වෙයි කියලා හිතලා.
ඕනෑම විෂයක් ගත්තම අවම තරමින් දිනකට පැය බාගයක්වත් කියවීම සඳහා වෙන්කල යුතුයි. සමාජ මාධ්‍යජාල එක්ක ගතකරන කාලය වැඩි වෙද්දි පොත්පත් පරිහරණය ක්‍රමයෙන් අපෙන් ඈත් වෙනවා.නමුත් ඉලක්කගත විෂයක් සඳහා සිත යොමු කිරීමට අභ්‍යාසයක් විදිහට කියවීම කියන දෙය අතිශයින්ම වැදගත්. විනාඩි 30 කින් ආරම්භ කරන්න.ඒ විනාඩි 30 අනිවාර්යයෙන්ම හැමදාම ඒ සඳහා වෙන්කරන්න. මීට පෙරත් කිහිප වරක්ම මා සඳහන් කරා මොළය කියන්නෙ අපේ සම්පූර්ණ ශරීරයේ ශක්ති අය වැයෙන් 20% පමණ ප්‍රතිශතයක් භාවිතා කරන අවයවයක් කියලා. ඒක නිසියාකාරව ක්‍රියාත්මක වෙන්න ඊට අභ්‍යාස අවශ්‍යයි. කියවීම ඔස්සේ දැනුම වැඩි කරගැනීමත්, ඒ හරහා නව මානයන් පිලිබඳව සිත යොමු කිරීමත් මේ අභ්‍යාසයන්ගෙ කොටසක්.
සමහර වෙලාවට කියවීමේදි අපිට එකතු කරගන්න පුළුවන් වෙන්නෙ ප්‍රෙහෙලිකාවක විසිරුනු කොටස් වගේ සම්බන්ධයක් නැති තොරතුරු ගොන්නක් වෙන්න පුළුවන්. නමුත් දීර්ඝකාලීනව මේ ව්‍යායාමයේ අඛණ්ඩව යෙදෙද්දි ඔබට හැකියාව ලැබෙයි සම්පූර්ණ චිත්‍රය ගොඩනගාගන්න.
භාෂාමය හැකියාවන් දියුණු කරගැනීම සඳහා අවශ්‍ය කරන සියළු දේම ඔබ සතුව පවතිනවා අන්තර්ජාලයට පිවිසීමේ හැකියාව තියෙනවානන්. මේ ලියමන කියවනවා කියන්නෙ ඔබට ඒ අන්තර්ජාල පහසුකම් තිබෙනවා කියන එක. අවශ්‍ය වන්නෙ උනන්දුව සහ උත්සහය පමණයි.
වරක් මහාචාර්ය විනී විතාරණ ගුරුතුමා සමඟ පිළිසඳරක යෙදෙද්දි එතුමා කියපු දෙයක් තමයි 'භාෂාව යනු සංස්කෘතිමය වාහකයෙක්' යන කාරණාව. සංස්කෘතියක් කියන්නෙ නව දැනුම් ගොන්නක්. භාෂාව කියන යතුර තිබෙනවානම් ඉතාමත් පහසුවෙන් ඔබට පුළුවන් මේ දැනුමෙන් පිරුණු අවකාශ සඳහා නිරන්තරයෙන් නිරාවරණය වෙන්න.
අපිට තිබෙන්නෙ ඉතාමත් සීමීත දැනුමක්. අන්තර්ජාලය භාවිතා කරන ආකාරය අනුව ඔබේ පවතින සීමිත දැනුම එක්කො ප්‍රසාරණය වෙයි නැත්තන් නැත්තටම නැති වෙලා යයි. මේ දෙකෙන් කොයි එකද තෝරගන්නෙ කියන එක ඔබට බාරයි.
(ඡායාරූප අන්තර්ජාලයෙන් උපුටා ගන්නා ලදී)
#DOE
No comments:
Post a Comment